(Ռատիօ Վատիկան) Իրաքի մայրաքաղաք` Պաղտատ գումարուած Քաղդէացիներու եպիսկոպոսական
արտակարգ սիւնհոդոսը վերջ գտաւ անցեալ շաբաթ` 7 Փետրուար 2015-ին, կոչ մը ուղղելով Իրաքի
ազգային կառավարութեան ու քրտական ոյժերուն պէտք եղած դրամագլուխներ երաշխաւորելու` օգնութեան
հասնելու այն ընտանիքներուն, որոնք ''ՏԱՀեՇԻ'' բռնագրաւումով զրկուեցան իրենց տուներէն
ու հողերէն։ Սիւնհոդոսական հայրերը միաժամանակ խնդրած են որ ազգային ու միջազգային
ոյժերը` կազմեն մէկ ճակատ, վերագրաւելու կորսուած հողերը ու կարելիութիւն տալու արտահաններուն
տուն վերադառնալ ու ապրիլ անվտանգութեան ու արժանաւորութեան մէջ։ Սիւնհոդոսի հայրապետները
ապա իրենց զօրակցութիւնը յայտնած են Քաղդէական լիկայի ստեղծումին ի տես որ - ըսած են
անոնք- պէտք է ունենայ քաղաքացիական բնոյթ։ Քաղդէացիներու եպիսկոպոսական արտակարգ
սիւնհոդոսի հայրերը հրաւիրած են հաւատացեալները հաւատարիմ մնալու իրենց եկեղեցւոյ ու
աւանդութիւններուն եւ մատնանշելով ասորիներու ու քաղդէացիներու արտահանումին ու ջարդին,
գործադրուած` երիտասարդ թուրքերու ձեռքով, ճիշտ 100 տարիներ առաջ, սիւնհոդոսը հաստատած
է որ ամէն տարի, Զատկուայ առաջին ուրբաթ օրը նուիրուի ու կը կոչուի ''նահատակներու
ու հաւատքի խոստովանողներու Ուրբաթ օր'' ոգեկոչելու համար ''ասորիներու ողջակիզումը''։